Урысые Федерацием зекIоным зыщегъэушъомбгъугъэным фэгъэхьыгъэ зэхэсыгъоу Къэралыгъо Советым ипрезидиум Ялтэ щыриIагъэр зэрищагъ УФ-м и Президентэу Владимир Путиным.
- Дунаим зекIоным зызэрэщиушъомбгъурэр, лъэпкъ экономикэхэм иIахьэу ахэлъми зэрэхахъорэр тэшIэ. Зэрэхъу хабзэу, зекIохэр къещэлIэгъэнхэмкIэ зэнэкъокъушхо макIо, IэкIыбым къикIырэ хьакIэхэр къещэлIэгъэнхэмкIи ары. Мыщ дэжьым тикъэралыгъо щыпсэухэрэри ащ имыкIхэу загъэпсэфынэуи шIыгъэн фае, - къыIуагъ Владимир Путиным.
ЗекIоным изегъэушъомбгъун шъолъырыбэ нахь лъэшэу пылъы зэрэхъугъэри Президентым къыхигъэщыгъ. ЗекIоным пылъ комплексхэр жъугъэу ашIых, зэтырагъэпсыхьэхэ хъугъэ. Къэралыгъом ит хьакIэщхэм япчъагъэ фэдитIоу хэхъуагъ. НахьышIум ылъэныкъокIэ зэхъокIыныгъэхэр щыIэх. ГущыIэм пае, 2014-рэ илъэсым Урысыем зыщызыплъыхьагъэхэм япчъагъэ процент 30-кIэ нахьыбэ хъугъэ ыкIи нэбгырэ миллион 41,5-м нэсыгъ. Ащ нэмыкIэу зекIоу къихьагъэхэм япчъагъэ процент 16 хэхъуагъ.
ЗекIоным изегъэушъомбгъун ылъэныкъокIэ Адыгеими хэхъоныгъэхэр ышIыгъэх. Мы илъэсым имэзих зекIоу тишъолъыр къихьагъэр проценти 10-кIэ нахьыбэ хъугъэ икIыгъэ илъэсым мыщ ифэдэ иуахътэ егъэпшагъэмэ. ЗекIонымкIэ ыкIи зыгъэпсэфыпIэхэмкIэ АР-м и Комитет къызэритырэмкIэ, илъэсныкъом зекIо мини 110-рэ фэдиз Адыгеим къэкIуагъ.
Зы мафэ е мэфэ зытIущырэ республикэм щыIэнхэу тпэгъунэгъу шъолъырхэм къарыкIыхэрэм япчъагъи хэхъуагъ. Нахьыбэу Адыгеим къакIохэрэр Къыблэ федеральнэ шъолъырым хэхьэрэ регионхэм ащыщхэр ары, ау гъэмафэм анахь чIыпIэ чыжьэхэми машинэхэмкIэ къарыкIыхэрэм ахэхъо. Хабзэ зэрэхъугъэу, Тыркуем, Сирием тилъэпкъэгъухэр къарэкIых. Мы илъэсым апэрэу Италиемрэ Израильрэ къарыкIыгъэ купитIу щыIагъ.
Лъэпкъ шхыныгъохэм ямэфэкIхэу къушъхьэхэм ащызэхащэхэрэми цIыфыбэ къыращалIэ. Адыгэ хьалыжъом, къэбым, къужъым ямафэхэр гукъэкIыжь IэшIоу ыкIи дахэу бэмэ агу къенэжьых.
ЗекIонымкIэ ыкIи зыгъэпсэфыпIэхэмкIэ АР-м и Комитет къызэрэщаIуагъэмкIэ, гъэмэфэ зыгъэпсэфыгъор ары зекIохэм анахьэу къызфагъэфедэрэр тиреспубликэ зэрагъэлъэгъунымкIэ, ичIыпIэ дахэхэр къакIухьанхэмкIэ. Ау илъэс реным якъакIо зэпыурэп. Джащ пае зекIоным тегъэпсыхьагъэу Iоф зышIэрэ хъызмэтшIапIэхэм ямылъку-хъызмэт зехьан къыкIэкIорэ ахъщэм илъэсым ыкIэ нэс хэхъонэу ежэх.
- Ащ дыкIыгъоу анахьэу анаIэ зытырагъэтырэр фэIо-фашIэу зэшIуаххэрэм ядэгъугъэ хэгъэхъогъэныр ары. Ащи Адыгеим зекIохэр нахь къырещалIэх. Ахэм афэгъэзэгъэ хъызмэтшIапIэхэм, зыгъэпсэфыпIэхэм аужырэ уахътэм агъэфедэрэ шIыкIэ-амалхэр аIэ къырагъахьэх, туроператорхэу ыкIи турагентхэу Урысыем инэмыкI шъолъырхэм Iоф ащызышIэхэрэм зэпхыныгъэ адыряIэу адэлажьэх, - къыщыхагъэщыгъ комитетым.
Адыгеим ипроектхэу зекIо-зыгъэпсэфыпIэ зэхэтэу «Лэгъо-Накъэ икъэлапчъэхэр» ыкIи зекIо-зыгъэпсэфыпIэ паркэу «Джэнэт» зыфиIохэрэм экспертхэм осэ ин афашIи, федеральнэ программэу «УФ-м иIэкIоцI зекIохэм ыкIи къихьэхэрэм язекIон изегъэушъомбгъун» зыфиIоу 2011 - 2018-рэ илъэсхэм ателъытагъэм хагъэхьагъэх.
Аужырэ илъэситфым тиреспубликэ икъушъхьалъэхэм язэтегъэпсыхьан, зекIоным епхыгъэ бизнесым изегъэушъомбгъун сомэ миллиарди 3 фэдиз пэIуагъэхьагъ. ЗекIохэм агъэфедэн алъэкIыщт псэуалъэхэм яшIын жъугъэу пылъых - хьакIэщ цIыкIухэр, псэупIэхэр, кемпингхэр, гъогугъунэ шхапIэхэр ыкIи нэмыкIхэр къаIэтых, зэтырагъэпсыхьэх. Къэгъэлъэгъон шъхьаIэхэм зэрахэхъуагъэм нафэ къешIы Адыгеим зекIон ыкIи хьакIэщ бизнесыр тэрэзэу зэрэщыгъэпсыгъэхэр. Ар республикэ хабзэмрэ бизнесымрэ зэрахьэрэ Iофыгъохэм якъэгъэлъэгъон.
Комитетым къызэрэщыхагъэщыгъэмкIэ, мы лъэныкъомкIэ Iофхэр зэрэкIорэм АР-м и ЛIышъхьэу ТхьакIущынэ Аслъан ежь ышъхьэкIэ ынаIэ тет ыкIи тапэкIи ахэр лъагъэкIотэщтых.
Адыгэ Макъ
